हाम्रो परिवारमा आमाले मीठो खाना पकाउनुहुन्छ। खाना नखाई हामी बाँच्न सक्तैनौं। हामी खाना बिना काम गर्न पनि सक्तैनौं। खानेकुराले हामीलाई तागत दिन्छ र हामी बलिया र मोटाघाट हुन्छौं। त्यसैले हामी खानेकुरा खान्छौं।हामी धेरै थरीका खानेकुरा खान्छौं। हामी दाल, भात, तिहुन र तरकारी खान्छौं। हामी ढिंडो र रोटी पनि खान्छौं। हामी अचार पनि खान्छौं। हामी कहिलेकाहीं फलफूल पनि खान्छौं। हामी दूध, दही, मोही र घिउ जस्ता पोसिला कुरा पनि खान्छौं। हामी कहिलेकाहीं माछा, मासु र फुल पनि खान्छौं।हाम्रा खानेकुराहरू कहाँबाट आउँछन्? हाम्रा मुख्य खानेकुराहरू अन्न र सागपातबाट तयार हुन्छन्। यिनीहरू खेतबारीमा उब्जन्छन्। धान, मकै, गहुँ र दाल खेतवारीमा रोपिन्छन्, फलाइन्छन्। तरकारी र फलफूल पनि बारीमा नै फल्छन्। गाई र भैंसीले खाने दूध दिन्छन्। दूधबाट नै दही, मही, घिउ र कुराउनी बन्छन्। दूध र घिउबाट थरीथरीका मिठाईहरू पनि बन्छन्।हाँस र कुखुराले फुल पार्छन्। फुलले पनि तागत दिन्छ। उखुबाट चिनी र सखर बन्छन्। हामी पसलमा चिनी किन्छौं। चियाको बोट हुन्छ। चियाको कलिला पातहरूबाट नै चियापत्ती बन्छ।